मंदोदरीच्या नैतिक विचारांची घुसमट
म टा...
म. टा. प्रतिनिधी, औैरंगाबाद
स्त्रियांवर अत्याचार करणाऱ्या पती रावणाशी एकनिष्ठ राहू की अन्यायाला विरोध करून जाब विचारू या घुसमटीत अडकलेल्या मंदोदरीची मनोव्यथा 'अंतर्द्वंद्व' नाटकाने मांडली. मंदोदरी आणि शूर्पणखा यांच्या संवादातून उलगडणारे नाटक भवतालातील प्रश्नांवर भाष्य करून गेले.
५९व्या महाराष्ट्र राज्य हौशी मराठी नाट्य स्पर्धेच्या अंतिम फेरीत पुण्यातील ललित रंगभूमीच्या 'अंतर्द्वंद्व' नाटकाचा प्रयोग रंगला. विद्यापीठाच्या मुख्य नाट्यगृहात सोमवारी (१७ फेब्रुवारी) सायंकाळी हा प्रयोग झाला. जगदीश पवार लिखित व प्रदीप गायकवाड-तन्मय जक्का दिग्दर्शित 'अंतर्द्वंद्व' नाटकाने रावणाची पत्नी मंदोदरीची व्यथा मांडली. काम आणि क्रोधात बुडालेल्या रावणाचा जाच अनेक स्त्रियांना सहन करावा लागला. पतीशी एकनिष्ठ असलेल्या मंदोदरीची यात सर्वाधिक कुचंबणा झाली. रावणाची बहिण शूर्पणखा आणि पत्नी मंदोदरी यांच्यातील संवादातून नाटक उलगडते. पतीव्रता म्हणून घुसमट सहन करायची की पतीला जाब विचारायचा या विचारव्यूहात अडकलेल्या मंदोदरीचे अंतर्द्वंद्व रसिकांना खिळवून ठेवणारे होते. रंभा, वेदवती, नागकन्या, देवकन्या यांच्यावरील रावणाचा अत्याचार माहीत असूनही पतीचा स्वभाव कधीतरी बदलेल अशी मंदोदरीची धारणा असते. पण, माणसाच्या सवयी कधीच बदलत नसतात हे शूर्पणखा बजावून सांगते. नाईलाजाने पतीव्रता राहण्यापेक्षा अन्यायाला विरोध करुन मुक्त होण्याचा विचार भोवती फिरत असूनही मंदोदरी ठाम राहते. स्त्री आणि सत्तेच्या नशेत जगणाऱ्या सत्ताधिशांच्या कैफावर नाटकाने प्रभावी भाष्य केले. गंभीर विषयाला साजेशा पार्श्वसंगीताने नाटक प्रभावी ठरले. नेटक्या नेपथ्यात कथानक प्रवाही पद्धतीने सादर करण्याचा प्रयोग लक्षवेधी होता. नाटकात सायली गीते, ऐश्वर्या गायकवाड, धारणा पंडीत, सागर खंडारे, प्राची दिवाकर, समीरा कुलकर्णी, चैतन्य शेंबेकर, वैभव जोशी, तन्मय जक्का, अमोल लांडगे यांनी भूमिका केल्या.
Comments
Post a Comment